Vyatha ek ped ki....

Main vriksha hoon is chaurahe ka
mera apna koi gaanv nahi.
mere tan se lipat ta na kisi ka aanchal
mere sar par bhi koi chaanv nahi.

Main khada hua hoon barson se
is zameen mein apni jadein jamaaye hue.
kuch shaakhon mein samete hoon apna aakaar
meri saansen hai yeh patte lehlahaaye hue.

Maine aksar logon ko kahte suna hai
mera hona is raaste par ek vardaan hai.
main hoon sukun har thaki hui zindagi ka
mujhse nikalti hui har raah aasaan hai.

Main yunhi ek adna sa beej tha, ki ek din pada paaya apne maali ko
maali bola, main tujhe ped banaunga.
tu janma hai panapne ke liye
yun tujhe nasht hone na doonga.

Maali ne jeevan daan diya mujhe
mahino khaad aur paani se seencha.
raksha ki meri junglee jaanwaro se
mere sar par apne sneh ka aanchal kheencha.

Main khilne laga, lehlahaa utha
maali ki mehnat rang laai.
meri daaliyan bhar gayi meethe phalon se
meri jadein duur-duur tak ja samaai.

Main peeta gaya, samet ta gaya
har aansu aur dard ko jo mujhse lipat jaata tha.
musafir aate gaye do pal chaanv ki talaash mein
main aasra aur sukun un sabke liye ban jaata tha.

Ek din maali aaya mera paas aur bola
"tera doosro par sab kuch lutaana mujhe sweekaar nahi.
maine tujhe seencha hai, ek beej se ped banne tak
mere alawa tujh par kisi aur ka koi adhikaar nahi.

Tu ab se kisi ko kuch na dega
tera sab kuch sadaiv mera hi hoga.
maine mehnat ki hai tujhe bada karne mein
tere phal mere siva koi aur kyun lega."

Main maali ko sun hua bahut hairaan...
"Tu mujhse apni koshishon ki keemat maangne aaya hai?
tere prayaas agar mujhpar koi karz hai to bas itna bata
kaunsa beta apne paalanhaar ko iski keemat de paaya hai?

Meri jadein dharti mein bahut gehri hai
main yahan se ukhad kar kahi aur jaa nahi sakta.
main deta aaya hoon chaanv, phal aur aasra sabhi ko
main ab kisi se yeh wapas paa nahi sakta.

Tu chahta hai main sirf tera hi rahun
to mujhe beej se ped na banaaya hota.
mujhe khaak mein kyun na mil jaane diya
main itna gehra to na samaaya hota.

Ab yahan se kahi aur na jaa sakunga
kisi praani ko apna sab dene se na rok paunga.
tu utha kulhaadi aur kaat de mera sar
tab zinda bacha to kya, aaj kat jaunga."

Maali chala gaya tay kar mere anth ka din
kal jab meri aatma par prahaar ho.
isse pahle ki main kat kar toot giru
ishvar aaj hi mera antim pranaam sweekaar ho.

Thaam le meri aatma ko bhagwan
main sirf apne liye kabhi jee na sakunga.
saari umar sab kuch deta aaya hoon apna
kabhi kisi se ab kuch le na sakunga.

Tu jeevan dega mujhe phir kisi din
tu chahega to main phir se janam loonga.
bas yahi vardaan de mujhe aaj marne se pahle
ki main agle janam mein bhi ped hi banunga....

Ek chota sa sawaal hai mera.......
Apna sab kuch doosro ko dene waala ped jab
apne maali ko keemat de nahi sakta,
to hum to insaan hai....
Kya len-den, keemat paana aur chukaana,
sauda aur vyapaar
yahi ek paalan karne waale ki pehchaan hai?